Wanting to get in a Poetic Mood? Or wanna create a Romantic atmosphere around u by some Poetry? Get the Best of them here.
Ham se hota kisi maqool bahaanay se alag
ham ne chaha tha jisay saaray zamaanay se alag
ham se bichhRa to khhula bhaid ye ham per, ik shakhs
apnay ghar se hi nahiN, tha woh gharaanay se alag
tujh se wabasta tha kia dil ka sabhi chaen o qaraar
dil hua mujh se tiray chhoR ke jaanay se alag
mujh se kaisa juRa baithha tha woh tareeki meiN
na gahaaN ho gia ik shama jalaanay se alag
ghar ki taqseem se hota nahiN taqseem lahoo
bhai hotay nahiN deewar uthhaanay se alag
chaen lainey na dia gardish-e-dauraaN ne mujhey
maera qiSSa hai mahabbat ke fasaanay se alag
Tanz ka teer nishaanay pe hi lagta hai sada
phhainka jaye ye kahiN khaah nishaanay se alag
yooN to har shehr nain dikhlaaye kaye khaab mujhey
teri basti ke thhe kuchh khaab suhaanay se alag
us ke maala meiN thha ik ganj-e-jawaahar ASIM
khaal-e-rukhsaar ka moti thha khazaanay se alag
ADVERTISEMENT